Mi pahnih rûkbote chhuah turin an phût

Aizawl Ramthar Veng Local Council, YMA, MUP leh MHIP-te chuan thuchhuah inṭawm siamin, February 2, 2015 zinga Bru hel nia hriatte'n mi pahnih an rûkbote chu him taka an chhuahna tura sorkar hmalakna an ngaichâng reng a, a theihna apianga sorkar hmalakna ṭawiawm an inhuam thu an tarlang.

Ramthar Veng LC leh NGO-te chuan, rukbo zinga pakhat zawk Zoluta @ Thangchhuaka chu kum 1979 aṭanga Ramthar Venga awm tawh, an veng mi leh sa dik tak a nih thu an sawi a; electoral roll-ah pawh a awm thu te, Kristian dik tak a nih thu te, Mizo ang chiaha awm a nih thute an sawi bawk.

Congress party, ZNP leh MPC ṭhalaite pawhin BRTF overseer Hukam Singh leh driver Zoluta/Thangchhuaka te rûkbo an ni chu an dem thu leh, thu delhkilh awm loa chhuah thuai tura an phût thu an tarlang.

MPCC chuan, mi pahnih rûkbo an ni chu thinrimthlak hle mah se, mimal leh pawl anga che lo a, chhanchhuahna leh hnuchhui kawngah sorkar ṭan lakna ṭawiawm zawk turin mipuite an ngen a, "Sorkar hmalakna ngaichâng turin kan ngen a ni," an ti.

ZNP chuan, Bru misualte chu an mi rukbo pahnihte intiamkamna siam loa a rang thei ang bera chhuah turin an phût a, rûkbote chungah thil pawi a thleng a nih chuan an thiam anga hma an lak ve dawn thu an sawi a; sorkar hmalakna an ngaihchan reng thu an sawi bawk.

MPC ṭhalaite chuan, India rama state rálmuang bera Bru misualte chet dan chu khamawm an tih thu sawiin, "Zoram ṭhalaite kan thawhchhuah hma ngeia a rang thei ang bera intiamkamna awm loa an mi rûkbote chhuah nghal turin kan hriattir a ni," an ti.

MUP general head­quarters pawhin thu­chhuah siamin, Hukum Singh leh Thangchhuaka te rûkbo an ni chu hriat­thiam harsa an tih thu leh an dem tak zet thu an tarlang a; rûkbote chhanchhuak thuai turin sorkar an ngen a ni.