Kawnpui-in zangnadawmna phût loin Rel chawlhhmun kawng siam an remti

Bairabi-Sairang rel kawng siam turah, Kawnpui aṭanga chawlhmun (station) pahnih panna kawng siam turah ram neitute'n zangnadawmna pek loha kawng siam an remti.

Kawnpui aṭanga rel chaw­hmun pahnih panna kawng sial tura ram tihchhiat tur neitute'n zangnadawmna pek loha an rama kawng sial an phalnaah hian ram neitute aiawhin an pawl chairman leh Kawnpuia VCP pahnihte'n hming an ziak a ni.

Rel chawlhhmun tur hi Kawnpui Station leh Hortoki Station-te a ni dawn a, chu chu Kawnpui V/C ram chhungah ve ve a awm. Kawnpui aṭangin kawngpui pawhtir a ni dawn a, a panna kawng chu Kawnpui aṭangin a hranpa ve vea siam tur a ni. kawng sial turah hian Hortoki VC president pawhin kar kal ta khan remtihna a ziak tawh bawk.

Kawnpui V/C-I te chuan nimin khan kawngpui sial tura ram neitu mi 70 velte chu Kawnpui Venglai YMA Hall-ah an kokhawm a; Kolasib-a Land Revenue & Settlement officer Zoramsiama leh North East Frontier Railways engineer Amit Jaiswal Engineer ten kawng siam dan tur an sawifiah.

Rel kawnga Kawnpui Station tur chu Kawnpui aṭangin km. 15 vela hlá a ni a, PWD enkawl lai Hortoki kawng (km. 11) pangngai rin nghal tur ni mah se, PWD kawng aṭangin km. 4 sial belh a ngai dawna, link road hlui chei ṭhat tum a ni. Link road hlui chei ṭhat tur hi mimal ram a ni a, ram neitute chuan zangnadawmna phût loin kawng siam an remti a ni.

Kawnpui V/C-II pawhin ram neitute an lo beráwn tawh a, ram neitute chuan zangnadawmna an phût lo a, zangnadawmna pek loha kawng siam an remtihna ziakin an pe tawh a ni.

Kawnpui V/C-II in a huam chinah hian, Kawnpui Station panna kawng tur tho, Sairang pêng piah aṭanga siam tur a ni a; hetah hian MGNREGS hmanga kawng laih sa km. 4 an ring nghal dawn a, chumni bakah chuan km. 5 laih belh a ngai a, km. 5 huam chhunga ram neitute chuan zangnadawmna an phût lo a ni.

Nimina inhmuhkhawmnaa tel ve Railways engineer chuan, ram neitu mi 180 velin zangnadawmna phut loa kawng siam an remtih tawh chuan, kawng siamtu tur Railways Establish Company-in hna an thawk ṭan mai dawn niin a sawi a, "Anmahni enkawltu tur inpector pawhin a chàmchilh nghal ang," a ti.

Railways hotute sawi danin, rel chawlhhmun panna kawng chu blacktop tur a ni a, state dangah chuan state sorkarin a siam thin a, a zau zawng pawh metre 7.3 a ni. Mizoramah erawh chuan Railways-in a siam dawn a, mahse rel kawng siamna tura sum ruahmanah a tel loh avangin metre 7.3-a zau chuan an siam thei dawn lo a ni.