MNF-in total bandh huaihawt an tum

MNF party chuan tun hnaia Mizoram sorkarin thil chi hrang hrang man a tihpun an duh lohzia lantir nan leh tihniam tura phût nan February 12, 2015-ah Mizoram pumah total bandh huaihawt an tum.

MNF thuneitu sang office bearers-te leh hotu dangte chu nimin khan senior vice president Tawnluia hoin Mizo Hnam Runah an ṭhukhawm a; January 22, 2015-a Mizoram hmun hrang hranga ‘Mipui thlavâng hauhna kawngzawh’ an huaihawtin awmzia a neih loh avangin February 12, Ningania total bandh huaihawt leh an rêl ta a ni.

MNF thuchhuah tar­lan danin, total bandh an neih chhan turte chu - buhfai man kg. khatah Rs. 9.50 aṭanga Rs. 15-ah tihsan a nih vang te, tui bill 100%-a tihpun vang te, leiman 200%-a tihpun vang te, electric bill nasa taka tihpun vang te, thisen dawngtu damlo aṭanga thisen sawngbawlna man unit khatah Rs. 550 zel lak vangte leh zu zawrh an duh loh vangte a ni.

MNF hotute ṭhu­khawm chuan, Mizoram sorkar chu thil chi hrang hrang man tihniam leh turin an phût a; tihhniam a nih loh chuan total bandh an huaihawt hnuah pawh na zawka sorkar nawr zui zel dan tur an ngaihtuah tur thu an tarlang.

MNF thuchhuah chuan, "Pu Lal Than­hawla sorkar minister, parliamentary secretary leh MLA rualte’n sorkar sum hmanga nuam tinrêng an tâwl hnuah, sorkar sum dinhmun tlakchhiatna vàwrtàwp an thlen hnu leh, mipuite hnena chhiah hmanga sum an khawn chiam chiam mai hi engti zawng maha ngawihbopui chi a ni lo," a ti.

MNF hotute meeting chuan, village council leh local council inthlan lo awm tur chu a ruala neih ngei ṭha an ti a, chutiang tur chuan thuneitute hnena thlen an rel a ni.