Scho' tur cheng vbc. 36 hmu tawh

Mizoram Scholarship Board (MSB) hotute chuan, Ministry of Tribal Affairs aṭangin February 3, 2015 khan zirlaite scholarship tur cheng vbc. 36 an hmu tawh thu leh, budget allocation an dil mek thu an sawi a; mahse Reserved Bank of India-in Mizoram sorkar sum báwmah a la dah lut lo a, an nghak mek tih an sawi.

MSB hotute chuan, scholarship chu higher secondary school tan cheng vbc. 11 an pe chhuak tawh tih sawiin, zirlaite bank account-ah thunsak zel a nih thu an sawi a, "Account-a lut lo emaw, dawngl o emaw a awm chuan account dik lo emaw, account number thehlut lo an ni ang," an ti.

MSB hotute sawi danin, Umbrella Scheme hnuaiah kum 2014-15 academic session-a Class-IX leh Class-X zirlai, tribal scholarship emaw, minority scholarship emaw dil lote tan dilna hun an hawng thar a; February 27, 2015 thleng dil theih a ni a, MSB office-ah ngaihven theih a ni.

Kum danga sorkar laipuiin tribal scholarship sum a vaia (100%) a rawn tum ṭhin chu kum 2014-15 ah chuan 90% chiah a rawn tum dawn a, 10% chu Mizoram sorkar tum tur a ni. State sorkarin a tum ve tur 10% a pek hma chuan scholarchip semah 90% chiah an pek rih dawn thu MSB hotute chuan an sawi.

Hetih lai hian, sorkar laipuiin kum danga 75% chiah a tum ṭhin, minority scholarship-ah chuan a vaiin (100%) a rawn tum dawn thung a ni.