Minister-in mirethei in sak mek a enfiah

UD&PA minister Zodintluanga chuan nimin khan Lawipu-a BSUP Housing Project hnuaia miretheite chenna tur in sak mek tlawhin, hna thawh tawh chinte a enfiah. Minister chuan, sorkarin miretheite a ngaihsak avangin, Lawipu leh hmun danga miretheite chenna tur in sak chu a puitlin ngei theih nan chak takin an bawhzui zel tih a sawi.

Minister Zodintluanga chuan, Basic Services to the Urban Poor (BSUP) Housing Project hnuaia Aizawla mirethei chenna tur in saknaah, a tirah contractor an bân a, chumi hnuah UD&PA-in department hmalaknain a kalpui tih a sawi.

Zodintluanga chuan, hna thawh­te chu kum 2007 rate anga estimate siam a nih thu a sawi a, "Estimate hi ennawn theih a ni si lo a, contractor leh sub-contractor-te tlawmngai turin kan ngen a, anni'n hlâwkna nei mumal loin tlawmngaiin an thawk hrâm hrâm a, kan lawm hle a ni," a ti.

UD&PA minister chuan, sorkarin miretheite hamṭhatna tur a ngaihtuah tih sawiin, BSUP Housing Project hnuaia miretheite chenna tur in sak mek pawh estimate rate hlui leh hniam tak chungin tihpuitlin ngei tumin ṭan an la tih a sawi a; inte chu luah theiha sak zawh a nih hunah chuan mirethei, harsa tak chunga mi in luaha khawsate'n an hlâwkpui ngei a beisei thu a sawi bawk.

BSUP Housing Project hi sorkar laipuiin mirethei, chenna tur in nei lo,te chenna atan leh slum area tihbona tura project a siam a ni a; Lawipu-a BSUP Housing Project atan hian cheng nuai 3403 ruahman niin, in 28 sak a ni. In 28-ah hi chhungkua 408 khawsak theihna tura ruahman a ni a; project-ah hian community centre, livelihood centre, tui, kawlphetha, kawngpui leh mamawh dangte a tel.

Minister Zodintluanga ho hian UD&PA, Power & Electiricity leh PHE department hotute'n in sak zawh hnua tui connection pek dan tur te, kawlphetha pek dan turte an sawiho nghal a; hmachhawp hrang hrang an siam a ni.

Zodintluanga chuan, Rangva­mual leh Durtlangah mirethei, chenna in nei lote chenna tur in ṭhahnem tak sak mek a nih thu a sawi bawk.

Minister Zodintluanga hian BSUP Housing Project a enfiah zawhah Lawipu khelmual a tlawh bawk a; Lawipu khawtlang hruaitute nen khelmual chhak lama laih zauh belh dan tur an enfiah a ni.