DMR minister-in SDRF hmanruate a enfiah

Disaster Management & Rehabilitation (DMR) minister C Ngunlianchunga chuan nimin khan DMR directorate tualah State Disaster Response Force (SDRF)-in chhan­chhuahna hmanrua a neihte a enfiah.

DMR hian nimin khan an pisa tualah chhanchhuahna hmanrua leh bungrua an neihte an pho chhuak a, chu chu minister C Ngunlianchunga'n enfiahin, an mamawh belhte leh ṭan lak zui dan turte department hotute nen an sawiho nghal. Minister hi MLA R Vanlalvena leh DMR secretary PC Lallawmsanga ten an ṭawiawm a ni.

C Ngunlianchunga chuan, SDRF fund aṭangin chhan­chhuah­na hmanrua hrang hrang an lei thar thu a sawi a' chung hmanruate chu khua leh veng hrang hranga pawlte hnenah an mamawh ang zelin an sem chhuak ṭhin tih sawiin, "Hmanrua kan sem chhuahte reng reng hi neitu thinlung pûa kan enkawl ṭheuh a ngai a ni," a ti.

DMR minister chuan, duh vang ni loin chhiatna a thleng fo a, a invenna leh chhanchhuahna lam ngaih pawimawh a ṭul thu a sawi a; chhiatna tâwk thei ṭheuh kan nih avangin, in leh bungrua­te insure uar ṭul a tih thu sawiin, "Insurance kan tih chuan chhiatna thlen palhah pawh eng emaw chen min phuhruk thei dawn a, chhiatna hi malsawmnaah a chang ve hlauh thei a ni," a ti. In leh bungrua insure chungchang zir chiang turin Gujarat-ah DMR-in mi an tirh mek thu a sawi bawk.

DMR secretary PC Lallawmsanga chuan, Mizoram police-a mi 662-te State Disaster Responce Force (SDRF) atan training pek an nih tawh thu a sawi a, "India ramah SDRF training chhuak nei tam ber pahnihna kan ni," a ti.

DMR hian SDRF hman tur leh Mizoram hmun danga sem turin hmanrua leh bungrua ṭhahnem tak an nei thar a, bungrua chah mek, thleng mai tura beisei an nei nual bawk.