MZP-in Zofate Chawlhbuk sa ṭan dawn

MZP chuan thuchhuah siam­in, vawiin hian Borapansury-ah Zofate Chawlhbuk sak ṭan an tum a, sak ṭannaa tel turin nimin khan MZP gen.hqrs hruaitute chuan an president Lalhmachhuana hoin Borapansury an pan.

MZP chuan, CADC huam chhunga Chakmate huangtau lutuk leh Mizote leh sumdawng veivakte'n Chakmate vanga harsatna an tâwk ṭhin chu ṭha lo an tih thu an tarlang a, "Kan pi leh pute'n lu chhum bán chhum huama an lo sah zau tawh sa kan rama ram leilung faten harsatna kan tâwk ṭhin hi ṭha lo kan tih avang leh Zofate ram ngei a ni tih tilang turin Borapansuri-ah Zofate Chawlhbuk sak kan tum a ni," an ti.

MZP tarlan danin, Zofate Chawlhbuk sak a nih theih nan kum 2012-ah hma an la ṭan a, a sakna atan Mizoram sorkar chuan Borapansury I-a Supply department ram sq.m. 2,500-a zau a sahthlak a, May 2, 2014-ah ram chu teh fel a ni. June 25, 2014-ah Zofate Chawlhbuk sak bul ṭan nan waiting shed an lo sa tawh bawk. Zofate Chawlhbuk hi RCC-a sak tum a ni.

MZP chuan, Borapansury-a Zofate Chawlhbuk sak a nih theihna tura Mizoram sorkarin ram ṭha tak a pek avangin an lawm tak zet tih an tarlang.