MLA-te'n bamboo factory-te an enfiah

Mizoram Legislative Assembly hnuaia Committee on Estimates member-te chuan February 3-4, 2015 chhung khan Industries department hnuaia Bamboo Development Agency hmalakna hmun hrang hranga mite an tlawh a, sum hmanna leh a taka hna thawh dante an enfiah.

Estimate Committee-te'n an enfiahte chu - Zamuang leh Zawlnuam khuaa Bamboo Wood Park for Export, Bungṭhuama Bamboo Wholesale & Retail Market, Lengte-a Export Promotional Industrial Park (EPIP), Chuhvel khuaa Bamboo Chipping Unit (Plant & Machinery) leh, Sairanga Mizoram Venus Bamboo Products Pvt. Ltd. te a ni.

Estimate Committee-te chuan an hmun tlawhahte hian mau sawngbawlna atana BDA sum sên ral dan leh hmalak dante an enfiah a; industry dintute'n mau lei leh hralh te, khawl hmanga mau sawngbawlna kawnga harsatna an tawh dante leh an hmalakna a ṭhuanawp dante an lo hrilhfiah a ni.

Committee on Estimates-te hian Bairabi-Zamuang kawnga Bairabi Tlawng luia lei dawh mek an tlawh bawk a, PWD chief engineer K Lalsawmvela’n an hna thawh dan leh thlen chinte a lo hrilhfiah. Lei dawh nan hian cheng vbc. 12.523 ruahman a ni a, May 2015-ah dawh zawh hman an tum niin an sawi. Committee member-te hian Sihhmui leh Lengpui inkara Tlawng lei dawh mek an enfiah bawk.

Committee on Estimates-ah hian chairman chu Lalrinliana Sailo a ni a; member-te chu - Dr Ngur­dingliana, Vanlal­zawma, T Sangkunga, R Vanlalvena leh Vanlal­awmpuii Chawngthu te an ni.