AMC sorkar thar a hnai? Cong leh MPC-in AMC-a thawh dun an tum
Aizawl Municipal Council (AMC) councillor pasarihte chuan nimin khan Aizawl DC hnenah AMC chairman Zarzoliana bàn tura ngenna an thehlut. AMC councillor-te lehkha hi DC aiawhin addl. DC Lalchungnunga'n a dawng.
AMC councillor-te chuan, AMC chairman-in majority a neih tawh loh thu an tarlang a, chairman nihna aṭanga bàn turin an ngen a ni.
AMC councillor-te lehkha thehluh chungchangah hian Aizawl DC chuan thehluh a nih aṭanga ni thum (working days) chhungin thutlukna a siam tur a ni a, February 10 thleng hun a awm tihna a ni. AMC chairman ni lai hi paih a nih chuan a aiawh tur thlan ṭhat leh a ni ang.
Aizawl DC hnena an lehkha thehluhah hian INC councillor - CT Zakhuma, Lalzirliana, F Lalhuthangi leh Laldinsangi, MPC councillor - PC Lalruatsanga, MPC aṭanga chhuak Rosiamngheta leh ZNP aṭanga chhuak Hmingthanzami ten hming an ziak.
AMC chairman rin tâwk lohna DC-a thehluttute chuan zawhna chhangin, chairman rin tâwk lohnaah hian hmun thuma ṭhena hmun khat a tâwk avangin hming ziak thei remchang mi pasarihin hming an ziak tih an sawi a, "Chairman thlan ṭhat a ngaih dawn chuan majority neih a ngai dawn a, chu chu kan tlin theih kan inring," an ti.
AMC councillor-te sawi danin, sorkarna an siam thei a nih chuan AMC chairman hmasa ber CT Zakhuma chu chairman a ni leh ang a, vice chairman leh executive councillor turte erawh chu la rel fel tura dah a ni.
AMC chairman bàn tura ngenna thehluh a nih hma hian nimin khan Congress party leh MPC party hotute chu an ṭhukhawm a; AMC atana thawh dunna thuthlung an ziak.
Thawh dunna thuthlungah hian MPCC aiawhin Congress Legislature Party treasurer Zodintluanga leh MPYCC general secretary Dr Lalmalsawma ten hming an ziak a; MPC aṭangin executive vice president Dr Kenneth Chawngliana leh vice president Lalthansanga ten hming an ziak.
MPC executive vice president Dr Kenneth Chawngliana chuan, thla ruk vel kal taa AMC sorkar a din khan AMC sorkar chak zawk an beisei a, mahse AMC sorkar chak zawk a ding ta lo tih a sawi a, "AMC chak, Aizawl khawpui ṭha
taka enkawl thei kan duh a, chuvang chuan MNF kaihhruai sorkara kan tel vena titawpin, Congress thawhpui kan ti ta a ni. Congress party nena thawhho hi kan party PAC thutlukna a ni," a ti.
AMC hmel lan dan
July 1, 2008 ah chief executive officer (CEO) kaihhruaina hnuaiah a function
November 3, 2010 ah AMC inthlan hmasak ber neih a ni
November 16, 2010 ah CT Zakhuma (INC) kaihhruai sorkar a piang
Vice chairman-ah Zarzoliana (ZNP) leh councillor-ah F Lalhuthangi (INC), Lalzirliana (INC) leh Hmingthanzami (ZNP) ruat an ni
July 18, 2014 ah MNF, ZNP leh MPC councillor 10-in Aizawl DC hnenah AMC chairman CT Zakhuma paih turin an ngen
July 23, 2014 khan CT Zakhuma kaihhruai sorkar bûk a ni a, paihthlak a ni
July 30, 2014 ah Zarzozliana (ZNP) kaihhruai, ZNP, MNF leh MPC councillor-te telna a piang
Vice chairman-ah Lalrinenga Sailo (MNF) leh councillor-ah Lalmalsawmi (MNF), C Lalsawivunga (MPC) leh W Chhuanawma (ZNP) te ruat an ni
February 6, 2015 ah councillor pasarihin AMC chairman Zarzoliana paih turin Aizawl DC an ngen