College zirlaite essay inziahsiak lawmman sem

Mizoram English Li­te­rary Society (MIELS)-in Inter College Poetry Writing Competition vawi hnihna an buatsaih zawh taka tiṭhate hnenah nimin khan Pachhunga University College-ah lawmman sem a ni a, minister Lal Thanzara'n a hmanpui.

Lal Thanzara chuan, khawvel changkang tawh takah ennawm hmuh tur leh ngaihthlak tur a tam a, thuziak chhiar hlutna hre pha lo ṭhalai tam tak an awm tawh laiin, English poetry inphuahsiaka tel tur zirlai ṭhahnem tak an awm chu lawmawm a tih thu a sawi a, "A ziak thiam ve lote tan pawh mifingte thuziak chhiar tam hi hriatzauna leh finna ril tak tak chharchhuahna hmanrua a ni," a ti.

Thuziak hmangin tute pawhin mahni duh zawng leh ngaihdan puang chhuak turin zalenna an neih thu sawiin, Lal Thanzara chuan, thuziak chu ngúnhnám aia thiltithei zawk tia sawi ṭhin a nih thu a sawi a; thuziak mite chu buaina leh harsatna chawk chhuak zawnga ziak lo turin a chah a ni.

Poetry Writing Competition-ah hian Aizawla college pariat leh Ser­chhip college aṭangin zirlai 25 an tel a; thupuite chu - ‘Clean and Healthy Mizoram’ tih te, 'Preservation of Water Resources’ tihte leh, ‘Clean hands, healthy children’ tihte a ni.

Inelnaah hian Malsawma (Govt. Aizawl College) chu pakhatna a ni a, lawmmanah certificate leh Rs. 10,000 a dawng. Pahnihna chu Shirley Lalrinfela (Pa­chhunga University College) niin, certifcate leh Rs. 7000 a dawng a, pathumna Lalhmangaihi (Govt. Hrangbana College) chuan certificate leh Rs. 5000 a dawng.