Darzokai weather bridge an dawh zo

MLA fund Rs. 2,00,000 hmanga mipuite’n hnatlanga Chhimtuipui Darzokaia lei (weather brigde) an dawh chu nimin khan bialtu MLA John Siamkunga, Mizoram Law Commission chairman-in a hawng.

John Siamkunga chuan, ṭhál chhunga hman tur lei an dawh thei chu lawmawm a tih thu sawiin, “In thawhrimna leh inpekna vang a ni a, ruahmanna kan siam tihlawhtlingtute zawng zawng chungah lawmthu ka sawi a ni,” a ti a; BRTF lamin March 2015 tawp hma ngeiin meilawng (marboat) dah an tum thu leh, lei dawh laia chim ta chu ṭha taka dawh zawh a nih dawn thu a sawi bawk.

Darzokaia lei dawh thar hi John Siamkunga’n MLA fund Rs. 2,00,000 a pek hmangin, S Vanlaiphai bial leh Sangau bial mipuite’n hnatlangin an dawh a; thingtuai hmanga dawh niin, ft. 8-a zau leh ft. 100 vela sei a ni. MMV rit phur chinin an zawh thei dawn a, kumin May thla thleng hman theih tura ngaih a ni.