MNF-in total bandh hun an sawn hlá

Sorkarin thil man chi hrang hrang a tihsan vanga MNF party-te'n February 12, 2015-a Mizoram puma ‘Mipui thlavang hauhna total bandh' huaihawt an tum chu hun remchang danga huaihawt turin an sawn hla.

Total bandh neih hun tur chungchangah hian nimin khan MNF Action Committee-te chu Mizo Hnam Runah an ṭhukhawm a; total bandh neih hun tura an ruat February 12 chu Mizo Student’s Union-in Rising Day an lawm ni tur leh T Romana College-in NAAC Grade 'B’ an hmuh lawm hun atana an ruat, programme engkim siam fel vek tawh a nih avang te, zirlai kum tawp exam hun a hnaih tawh avangin sawn hlat an remti a ni.

MNF senior vice president Tawnluia leh hotu dangte nen MSU hruaitute leh T Romana College SU hruaitute chu nimin vek khan MNF office-ah an ṭhukhawm a; Tawnluia chuan, total bandh huaihawt an tum chu zirlai pawlte’n an ngennate zahawm an tih avang leh zirlaite hmakhaw ngaih vangin an sawn tih a hrilh.

MNF senior vice president hian nimin vek khan Mizo Hnam Runa inkhawmah thu a sawi a, "Congress sorkar hnuaia thil duhawm lo a thlen apiangin mi dang puh an chíng a, hetiang sorkar hi ding zui zel tlak a ni lo," a ti.

Tawnluia chuan, CM Lal Thanhawla’n zu zawrh an tum chhanah, ‘Kohhranin an tih tur an tih loh vangin zu in lo thei lote buaipui an ngai,' tia a sawi chu a demawm tak zet tih a sawi a, "MNF hian zu a rûi lo a, zu zawrh kan duh loh thu kan au chhuahpui zawk a ni," a ti bawk.

Hetihlai hian MSU leh T Romana College Students' Union-te chuan thuchhuah siamin, programme pawimawh nei tura an lo ruahman tawh vanga MNF-ten February 12-a total bandh neih an tum sawn tura an ngenna MNF-in an tihhlawhtlin avangin lawmawm an tih thu an tarlang.