Kawnpui daiah mi pahnih ruang chhar A thattu police-te kutah a inpe nghal

Nimin chawhma dar 10 vel khan Kawnpui dáia kawng cho inṭanna Khankawn chhak, Zanlawn ram china thlámah huan enkawltu Rongura Sailo (51), Tualbung leh Lalnghakliani (54), Kawnpui Vengthar-te thia chhar a ni. Mi pahnihte thattua puh Hual­liana, Manipur lam mi, Kawnpuia khawsa mek chu nimin chawhma vek khan man a ni a; Kolasib district jail-ah an dah nghal.

Mi pahnihte thia hmu hmasatu, Lalzarmawii, Kawnpui Banglaveng sawi danin, a ṭhian­nu Lalnghakliani leh Rongura te nen Ningani khan hmunphiah an kêk a, tlaiah amah chu khuaah hawin, an ṭhiante erawh chu thlámah an riak a ni. Nimin chawhma dar 10 rîk hma deuha hmunphiah kehpui tura a sâwm tur chu thlámah Rongura Sailo nen thiin a hmu a; thlam awmna huan neitu hi Lalzuitluanga, Chaltlang, Aizawl a ni.

Rongura leh Lalnghakliani-te hian an taksaah hliam an tuar nual a, chema sahna hnûhmáte a awm. Kawnpui police-te'n a hmunah kal­in thil awm dan an enfiah nghal a, chumi hnuah an ruang hi Lungdai damdawi-inah enfiah a ni.

Nimin chawhma dar 10:30 vel khan Hualliana, Kawnpui Hmarveng nia insawi chu a nupui nen Kolasib Police Staion-ah kalin a inpe a, nimin chawhnu lam khan magistrate phalnain jail-ah dah nghal a ni.

Hualliana chuan, Rongura nen thlámah an inhnial a, kut a thlak ta mai niin police hmaah a sawi. Rongura nen inhuatna an nei hran lo a, tlaiah an inhnial a, zan dar 8 velah an mut hnuah a that ta tih Kawnpuia chanchinbu mite a hrilh.