Minister-in ZRSC Week khârna hmanpui

Zirtiri Residential Science College chuan nimin khan Chanmari YMA Hall-ah College Week khârna inkhawm an hmang a, minister of state C Ngunlianchunga'n a hmanpui.

C Ngunlianchunga chuan, Mizoramah pawh information technology a sàn tawh thu sawiin, "Zirlai leh ṭhalai tam takin zirlai aiin phone kan buaipui nasa lutuk em aw a tih theih. Ni khata darkar 24 hi in hman thiam a ngai tak zet a, hunbi mumal tak neia hun hman ṭhin a pawimawh hle a ni," a ti a; zirlaite chu tuna an awm dan chu nakin­a an awm dan hriltu a ni dawn tih hria a, an hunte hmang fimkhur tur leh ram leh hnam tana chhawr tlak nih tum turin a chah.

Zirtiri Residential Science College-ah hian zirlai naupang 640 vel leh zirtirtu leh thawktu dang 70 vel an awm mek a ni.