Rûkbote an chhuah thuai loh chuan Na takin sorkar a che ang: HM Zira

Home minister R Lalzirliana chuan, NLFT leh BDFM-te'n February 2, 2015-a an rukbo, BRTF overseer Hukam Singh leh driver Zoluta/Thangchhuaka-te chu an chhuah thuai loh chuan na taka sorkar a chêt tur thu a sawi.

Home Minister hian nimin khan Congress Bhavan-a inkhawm­ah thu a sawi a, mi rubotute chu an mi hrênte thu delhkilh awm loa chhuah tura phûtin, "NLFT leh BDFM-te'n mi an rubo fo mai hi sorkarin ṭha a ti lo tak zet a ni," a ti.

Tripura transit camp-a Mizoram Bru awmte hruai kîr dan tur sawiin R Lalzir­liana chuan, "Heng mite hi Supreme Court thupek angin thla ruk chhung­a Mizorama hruai kîr dan tur rua­hman mek a ni," a ti a; refu­gee camp-a Bru awm mekte Mizorama an kîr a, an awmna ngai ṭheuha an awm leh chu Mizoram sorkar, political party leh tlawmngai pawlte duh dan a nih thu a sawi.

MPCC vice president chuan, NLUP chu sorkar laipuiah hêk a nih thu a sawi a, "Hei hi mi retheite an ngaih pawimawh loh vang a ni a, Pathian zarah NLUP hi kan la sem zel dawn," a ti a; beih an tawh nasat thu sawiin, "Kohhran upa hoin min bei a, sum tam tak sêngin mi ruai mah se, kan dik lohna hai lan tur a awm lo," a ti bawk.

MNF-in total bandh huaihawt an tum chungchangah R Lalzirliana chuan, "Hah taka kan hnathawhte chawlhna hun min pe a ni mai. Sumdawngte pawhin mi dang an chhuah loh chuan pawi an ti bik lo," a ti.