Polytechnic tur leh GLWSS enfiah

Parliamentary secretary H Zothangliana chuan, nimin khan Thingkah khuaa Polytechnic tur sak mek leh Greater Lawng­tlai Water Supply Scheme hna thawh mek a tlawh a, hna thawh dan a enfiah.

Ministry of Human Resources sum hmanga Thingkaha Polytechnic tur sak mek a tlawhnaah H Zothangliana chuan, Thingkah khawtlang mipuite chu hnathawktute ṭawiawm ṭha tur leh zangnadawmna leh therhhlo mai mai vanga hnathawhnaa harsatna siam lo turin a ngen a, "Hetiang zirna in pawimawh, nakkin lawka kan tu kan fate hmakhua tiêngtu tur kan nei tur hi phûr taka dawnsawn a ṭul hle a ni," a ti.

Polytechnic hi Lawngtlai PWD Building Division hnuaiah contractor parukte'n an thawk mek a, a din nan cheng vbc. 8 ruahman a ni. Hna thawh zawh hun tura ruat liam tawh mah se, a panna kawngah harsatna a awm avangin thla riat chhung pawhsei dil mek a ni tih sorkar thuchhuahin a tarlang.

Greater Lawngtlai Water Sup­ply Scheme hnathawk mek­ah hian Chhimtuipui aṭanga tui lak tura ruahman a ni a, cheng vbc. 26.645 senna tur a ni. H Zothangliana chuan Greater Lawngtlai Water Supply Scheme chu Lawngtlai mipuite nghahfak a nih avangin, hnathawktute chungah beiseina sang tak an neih thu contractor-te a hrilh.