Gas-ah DBT kalpui ṭan a ni tawh

Suakchhunga Gas Agency chuan nimin zing khan Electric Veng, Aizawl­ah eirawngbawlna gas (LPG) an sem a, Direct Benefit Transfer (DBT) scheme zawma tifel tawhte chauh gas an pe nia thu dawn a ni. India rama DBT kalpui ngei tura tih ṭan hun tura ruat chu April 1, 2015 a ni.

Electric Veng mipui­te hnen aṭanga thu dawn danin, Suakchhunga gas Agency hian nimin zing khan gas an sem a, mahse DBT zawm tawhte chauh lak an phal a ni. Gas semtute chuan DBT zawm tawh mipui­te chu Suak­chhunga Gas Agency office-ah Rs. 880 pe a, coupon la chhuak turin an ti a, coupon neite chauh gas an pek theih thu an sawi.

Electric Veng mite chuan, DBT tihfel nan March 31, 2015 thleng hun a la awm a, mi tam takin an la tihfel hmaa DBT tifel tawhte chauh tana gas sem chuan mi tam tak tan harsatna a thlen thu Vanglaini palai an hrilh.

Hemi chungchangah hian, Vanglaini palai zawhna chhangin Supply secretary R Lalvena chuan, DBT-a tihfel ngai zawng zawng tifel tawhte chu a man toa gas leitir theih tawh an ni a, mahse Mizoramah chuan a taka kalpui a la nih loh thu a sawi a; gas agency-te'n a taka DBT an kalpui dawn chuan felfai tak thil tih hmasak a ngaih thu a sawi.

Mualkhang Gas Bottling Plant-a IOC hotute pawhin Vanglaini palai zawhna chhangin, DBT tifel tawhte-ah chuan gas chu a man toa hralh theih a nih tawh thu an sawi a; mahse a tifel leh tifel lo an la inpawlh nuai avangin tihsual palh a hlauhawm a, fimkhur a ngaih thu an sawi bawk.