Langtlang leh huapzo rorelna kalpui tlat kan tum - Chief Minister

Mizoram Peoples' Forum (MPF) hruai­tute chuan nimin khan chief minister Lalduhoma a pisaah an kâwm a; CM chuan, langtlang leh huapzo rorelna kalpui an tum tlat thu a lo hrilh.

Chief Minister chuan, mipuite'n rilru thar púin sorkar thar an siam tih sawiin, "Huaisen takin, langtlang leh huapzo rorelna kalpui tlat kan tum. Sorkar ni tin kal dan uluk taka lo thlira lo zir chiang a, tih dan tur ṭha zawk nia langte sawiho hi a ṭangkai em em a ni," a ti.

Tun hnaia special drawing facility hmanga ni li emaw vel chauh sum an pûk belh chhan chu state sorkar tana a hlâwk zawkna a awm vang a nih thu sawiin Lalduhoma chuan, "Central sorkarin pûk theih chin a siam chhungah chauh sum pûk kan tum," a ti a; leiba chhawm an ngah avangin harsatna an tawh thu a sawi.

Chief Minister hian State Project Moni­toring Committee kal mek dan te, tun hnaia hnathawh chhia media-a lang ṭhenkhat thawktute chunga hma an lak dan te, tender ṭhenkhata sorkar thutlukna siam dante leh inrenchemna lama hma an laknate MPF hruaitute a hrilh.

MPF general secretary Rev. Lalramliana Pachuau chuan, kum chanve chhungin sorkar hmalakna ṭha leh duhawm tak tak hmuh tur a tam avangin an lawm hle tih a sawi a, "Ṭha taka ram inrêlbâwlna leh hmasawnna a kal zel theih nan kan pawl thiltumin a sawi angin MPF-in a ngaih pawimawh thilte kan rawn thlen a ni," a ti.

MPF hruaitu dangte pawhin thu sawiin, "Media hmanga inbeihna a nasa a, mipui kan phâwklêk fo niin kan hria. Sorkar sawiselna tam tak hi thu taka ngaih tlak loh te, thu tling lutuk lo nasa taka han vawrh lâr luihte an ni tih a hmuh theih," an ti a; chutih rualin, fimkhur lehzuala sorkar a kal a ṭulnate pawh a awma an hriat thu an sawi bawk.

CHIEF MINISTER SAWI DANGTE

* CBI hnenah ram dan tharin a phût ang thlapin general consent kan pe.

* Aikal lâk kan titawp dawn a, dan awm sa kan kengkawh ang.

* Non Practicing Allowances chungchangah dan ang taka kal kan tum.