Chhim lama airport siam a ṭul thu MP-in Aviation Minister a sawipui

Lok Sabha MP Richard Vanlalhmangaiha chuan nimin khan New Delhi-ah Civil Aviation minister Ram Mohan Naidu Kinjarapu chu a pisaah a kâwm a, Mizoram chhim lama airport siam chungchang a sawipui.

Richard Vanlal­hma­ngaiha chuan, Mizoramah airport pakhat chiah a awm avangin indaih lohna a nasat thu Civil Aviation Minister hnenah a sawi a, "Mizoram hmun hrang hrang aṭangin a panna kawngah harsatna kan tâwk nasa a, a bikin Mizoram chhim lamah airport siam a ṭul. A hmunhma vel pawh eng emaw chen hmalakna a awm tawh," a ti.

Aviation minister Ram Mohan Naidu Kinjarapu chuan, airport hmunhma a ngaih pawimawh thu a sawi a; airport hmun tur a awm thei dawn a nih chuan hmalak a inhuam thu a lo hrilh.

Lok Sabha MP hian Manipur buai vanga tlang mite Imphal Airport-ah an kal theih loh thu leh chumi avang chuan Lengpui Airport-ah thlawhtheihna in daih lohna a nasat thu a sawi a; Lengpui Airport-ah thlawhtheihna service a tam zawk theih nan hma la turin Aviation Minister a ngen bawk.