Ram pawn aṭanga kuhva leh sawhthing lak luh tihtawp Mizoram MP-in a phût

Parliament monsoon session neih mekah Rajya Sabha MP K Vanlalvena chuan nimin khan thu sawiin, India hmarchhak biala kut hnathawktute'n kuhva leh sawhthing an tharte hralhnaah harsatna an tawh thu leh India ram pawn aṭanga kuhva leh sawhthing lak luhte tihtawp a ṭul thu a sawi.

K Vanlalvena hian nimin khan Parliament session-a zero hour-ah thu sawiin, India ram pawn aṭanga kuhva leh sawhthing lak luh tihtawp a ṭul thu a sawi a, "Hmarchhaka kut hnathawktute'n kuhva leh sawhthing an thar hralhnaah harsatna an tâwk a, ṭhenawm ram dangte aṭanga heng thlaite hi India rama lak luh vang a ni," a ti.

Hmarchhak mipui tam takte ei leh bara an inghahna chu kuhva leh sawhthing a nih thu sawiin K Vanlalvena chuan, "Myanmar aṭangin dan loin kuhva ro tam tak Mizoram leh Manipur kaltlanga lak luh a ni a, India ram leh Myanmar ramriah India sorkarin Customs leh Assam Rifles-te a duty tir chungin ramri kaltlangin dan loa sumdawng (smuggler)-te'n kuhva ro tam tak an la lut a ni," a ti a; hmarchhak mipui tam takin smuggler-te leh sorkar mi rawihte ṭangrualin kuhva ro chu an la lut nia an rin thu a sawi.

Rajya Sabha MP chuan, China aṭangin sorkar laipuiin sawhthing a la lut tih sawiin, "Ṭul lo taka ram dang aṭanga sawhthing leh kuhva lak luh hian hmarchhaka kut hnathawktute eizawnna a tihchhiat avangin sawhthing leh kuhva lak luh hi tihtawp thuai ka phut a ni," a ti bawk.