MNF mi leh sate thubuai la neih Manipur High Court-in a titawp

Manipur High Court chuan Mizo National Front (MNF) mi leh sate'n Manipur-a thubuai (criminal case) an la neihte chu a titawp.

MNF mi leh sate hi kum 1984-ah Manipur-a pawi khawiha puh an nih avangin thubuai siamsak an ni a; thubuai chu hun rei tak chinfel loha a awm hnuah Manipur High Court chuan July 23, 2024 (Thawhlehni) khan thutlukna a siam a, thubuai a titawp a ni.

Manipur High Court chuan India sorkar, Mizoram sorkar leh MNF inremnaah MNF-te an rammut laia pawi an khawihna zawng zawng chu ralthuam an dah a, remna leh muanna an huam chhunga an thlentir chuan tihtawp tura tih a nih thu a tarlang.

MNF mi leh sa Manipur-a thubuai neite chu kum 2000 khan koh (summon) an ni a, mahse, an ukilte chuan inremna thuthlung avangin thubuai hi tihtawp tur an nih thu an sawi.

Manipur sorkar ukilte erawh chuan, inremna thuthlunga tarlan, thubuai tihtawp chungchang chu Mizoram chhunga an pawikhawihna chauh a nih thu leh MNF mi leh sate pawi khawihna thubuai chu Manipur-ah a nih avangin inremna hian a huam ve lo niin an sawi thung.

Manipur High Court chuan uluk taka a ngaihtuah hnuah MNF mi leh sate kum 1984-a Manipur-a pawi khawiha puh an nihna thubuai chu a titawp ta a ni.