Zokhawtharah bungrua a lut rih lo; CBI-in kuhva an chhui dawn vang?

Nimin khan Myanmar aṭangin Zo­khaw­tharah bungrua lak luh phal a ni lo a; Zokhawthar Village Council chuan Myanmar aṭanga kuhva rah tawlh­rûk Cental Bureau of Investigation (CBI)-in an chhui dawn vang a nih thu an dawng.

Zokhawthar VC President hnen aṭanga Vanglaini thu dawn danin, Myanmar aṭanga dan loa kuhva tawlhrûk chhui turin CBI mi leh sate Zokhawtharah an kal dawn a, chuvang chuan July 25, 2024-ah Myanmar aṭanga bungraw lak luh a rem dawn loh thu Customs department aṭangin an dawng a ni.

Zokhawthar VC President chuan, Myan­mar aṭanga bungraw lak luh phal loh hun chhung tur hriattir an nih loh thu a sawi bawk.

Hetih lai hian, nimin tlaia Vanglaini palaiin a biak lai chuan Zokhawthar VCP chuan, CBI-te an kal âwm a hriat loh thu a sawi. Myanmar aṭanga bungraw lak luh erawh remtih a ni rih lo a, bungraw luhna ṭhin chhehvel chu a reh vek tih a sawi a ni.

Tarlan tawh angin, Gauhati High Court, Aizawl Bench chuan Van­ram­chhuangi, Chaltlang PIL thehluh kal zelah July 22, 2024 khan order tichhuakin, Myanmar aṭanga dan loa kuhva tawlhruk chhui turin CBI a hriattir a ni.