Zirna lehkha lem hmang lakah Health dept.-in FIR an thehlut

Health & Family Welfare department chuan National Health Mission (NHM) hnuaia dental surgeon hna thawk ṭhin, zirna lama lehkha pawimawh (document) lem a hman vanga báng ta Christina Lalṭhazuali, Dinthar, Aizawl lakah FIR an thehlut.

HFW department hian July 18, 2024 khan Aizawl SP Office-ah first information report (FIR) an thawn a, SP Office chuan July 24, Nilaini khan an dawng. Aizawl SP Office hian FIR a ziah luh theih loh avangin Aizawl Police Station-ah ziah luh turin an thawn chhâwng a, Aizawl PS hian thubuai ziak lutin an chhui zui ang.

Health department hotute hnen aṭanga Vanglaini thu dawn danin, document lem hman chungchang hi an ngai thutak a, ngawih­bopui chi-a an ngaih loh avangin FIR an thehlut a ni.

Tarlan tawh angin, MZP chuan, NHM hnuaia February 23, 2023-a dental surgeon lak zingah document lem hmang an awm tih hriain, Health Minister hnenah hma la turin an ngen a; document lem hmangtu Christina Lalṭhazuali chuan June 5, 2024 khan a hna aṭanga bànna a thehlut a, a tûkah thuneitute'n an pawmsak nghal.

Christina Lalṭhazuali hi dental surgeon anga NHM hnuaia a thawh chhungin Thenzawl PHC leh Kawnpui PHC-ahte a thawk ṭhin a ni.