KHAWTHLIR

Thisen pe

YMA, Kolasib Project Veng chuan nimin khan Kolasib District Hospital tan thisen unit 10 an pe a, petute mipa pariat leh hmeichhia pahnih an ni. Kolasib Hospital-ah vêk hian nimin khan CZ Higher Secondary School-in thisen unit 5 an pe bawk.

Financial & digital literacy campaign

Mizoram Rural Bank, Baktawng Branch chuan nimin khan Chhuanthar Tlangnuamah sum leh pai enkawl dan chungchang inzirtirna, Financial & Digital Literacy Campaign an buatsaih a; MRB chairman Sheryl L Vanchhong, NABARD deputy general manager Pankaja Borah leh Mizoram sorkara joint secretary Zonunthari ten an hmanpui. Sum leh pai enkawlna leh digital payment chungchanga thil pawimawhte inzir­tirna hun hman a ni.

Truck-in chil hlum

July 24, Nilaini tlai dar 4 vel khan Lalbiakhlui (3) d/o Lalṭhuama Pautu, Kawlkulh chu truck-in a chíl hlum. Kawlkulh aṭanga thu dawn danin, UPC (NEI) chuan an biak-in bula ram chu excavator an laihtir a, leivûng paihtu tipper, leivung dawh tura hnung zawnga kal chuan driver awm lohna lama Lalbiakhlui awm chu a chíl a ni. Lalbiakhlui hi ká chhawn loin a thi a, nimin khan a ruang endik a nih hnuah vui a ni.

Hri danna sawiho

State Task Force for Immunisation chu an chairman Sangchin Chinzah, Health secretary hoin nimin khan Secretariat conference hall-ah an ṭhukhawm a, Mizoram district hrang hranga hri danna pek dan leh hlawhtlinpui tawh dante an thlirho. Mizoram pumah naupang kum 5 chin hnuai lam zinga 95% tal hri danna pek a nih theih nan theihtawp chhuah mek a nih thu tarlan a ni.

Mipui awlsamna

Khawlzawl DC office chuan nimin khan Neihdawn khuaah certificate hrang hrang - schedule tribe, income, residential/hailing, un-married, tax exemption leh a dangte DC office kal kher ngai loa a hmuna dila pek chhuah nghal theihna an buatsaih a; vawiinah Hmuncheng khuaah an buatsaih leh ang.