Lawngtlai dist-a petrol pump-te'n tuialhthei an la lut dawn rih lo

Lawngtlai District Petroleum Dealers (LDPD) chuan thuchhuah siamin, an sumdawnnaah harsatna an tawh nasat avangin an harsatna leh buaina chinfel a nih hma chuan Lawngtlai district-a filling station (petrol pump)-te'n July 29, 2024 aṭangin tuialhthei lak luh tawh rih loh an tum thu an puang.

LDPD chuan, Lawngtlai district-a petroleum retail outlet dealer (petrol pump)-te'n oil marketing company (OMC) guideline angin hun eng emaw chen harsatna lian tham tawk loin, tluang takin sumdawnna an lo kalpui tawh ṭhin tih an tarlang a, "Tun hnaiah kan sumdawnna atana harsatna siam thei zawngin páwn lam mi nasa takin an rawn inrawlh tih hriat a ni," an ti.

Mipui mamawh (essential commodity) phuhrutu an nih avangin harsatna an tawh tam zawk chu an ngawih bopui ṭhin tih sawiin LDPD chuan, "Amah­erawhchu, ṭha taka sumdawng thei tura zalenna kan neih chu dik lo taka rahbehsak kan ni chho ta mawlh mawlh mai leh hleih nei taka rorelna awm ṭhin te, duhsak taka min dawr ṭhintu kan customer-te'n harsatna an tâwk ta fo maite hi a ṭha kan ti lo," an ti a, an sumdawnnain nasa taka a tawrh thu an tarlang.

LDPD chuan, OMC aṭanga monthly sales target tuk ang zat tlin thei lo mai tur dinhmunah an ding mek hlawm tih tarlangin, "Hetiang hi kan dinhmun a nih avangin July 29, 2024 (Monday) aṭang hian kan harsatna leh buainate chinfel a nih hma chu Lawngtlai district chhunga petrol pump zawng zawngte chuan load lak chhunzawm tawh rih loh mai ni se kan ti," an ti a; tuialhtheiah harsatna a awm phah a nih pawhin mipui hriatthiamna an ngen.

Thu dawn danin, Lawngtlai district-ah hian filling station paruk a awm mek a; Lawngtlaiah pali, Sangau leh Bungtlang South-ah pakhat ve ve a awm a ni.

Central YLA chuan thla khat vel kal ta aṭang khan Myanmar rama Rakhine state-a tuialhthei leh leiṭha phur lut tur an dang a, hei vang hian Lawngtlai leh Siaha district-a petrol pump-te chuan harsatna an tawk nia thu dawn a ni.

All Mizoram Petroleum Dealer's Association chuan July 2, 2024 khan thuchhuah siamin, tun hnaia Siaha district-a kal tur tuialhthei phur tank lorry-te Lawngtlai bula dan a ni chu ṭha lo an tih thu an tarlang a, "Mipui mamawh (essential commodity) /explosive phurte kawng laka dan hi a him loin, ṭha kan ti lo a, thu­neitute'n a rang lama hma min laksak a, petrol pump thlenga him taka min thlensak turin kan ngen a ni," an ti.