Chief Minister leh Indian Oil hotuin eirawngbawlna gas an sawi dûn

Chief minister Lalduhoma leh Indian Oil state office-a chief general manager (LPG) DP Vidyarthy te chu nimin khan CMO-ah an inkâwm a; DP Vidyarthy chuan, Mualkhang Gas Bottling Plant chu ni tin gas bûr 6,000 chuang thun theihna tura tilianin an tharthawh dawn thu a sawi.

CM Lalduhoma chuan, hun eng emaw chen hman tawh loh Mualkhang Gas Bottling Plant siam tharna tur leh oil depot thar siamna tura Indian Oil hmalakna lawmawm a tih thu a sawi a, "Oil depot phei chu Mizoram mipuite'n kan nghakhlel tawh a, chak takin hma la u la, puih in ngaihna apianga pui tur che uin kan inpeih reng a ni," a ti.

DP Vidyarthy chuan, Mualkhang Gas Bottling Plant chu ni tin gas bûr 6,000 chuang thun theihna tura tharthawh a ni tur thu sawiin, "Hei hi Mizoram ni tin mamawh zat aiin a tam zawk. Oil depot siamna tur hmun pali kan thlithlai mek a, hun rei lo têah kan thlang tawh dawn a, a hmun a fel chuan hma kan la nghal ang," a ti.

DP Vidyarthy chuan, composite cylinder chu a zâng a, enkawl a awlsam bakah a puah theih loh thu te, mipuite'n an gas distributor-ah ṭheuh composite cylinder chu ngaihven se an duh te, gas sem dan kalphung felfai leh mipui tana awlsam zawk tur an buaipui mek thute a sawi bawk.

Chief Minister hi Food, Civil Supplies & Consumer Affairs minister B Lalchhanzova'n a ṭawiawm a; Indian Oil Chief General Manager (LPG) hian gas bûr thar (composite cylinder) Chief Minister hnenah a hlân. Gas bur a hlante chu cabinet minister-te hman tur a ni.