Mau hmanga thil siam zirhona buatsaih

Mizoram Pollution Control Board (MPCB), Bamboo Development Agency leh Commerce and Industries department-te chuan nimin khan Central YMA Hall-ah ni hnih awh tur mau hmanga thil siam chhuah inzirtirna, 'Eco-Master Trainers Training on Bamboo Crafting' an buatsaih ṭan.

Training hawnnaa khuallian Liankima Lailung, IFS (rtd.), MPCB chairman chuan, "Mizoramin leilung hausakna kan neih ṭhat ber mau hman ṭangkai kan zir a, ṭhangtharte hnenah kan zirtir chhâwn zel a tul. Ṭawih ral thei lo plastic leh polythene aiah mau hmanga thil siamte kan hman uar deuh deuh a ṭul," a ti a; training-a tel tur eco-club green teacher-te chu duhsakna a hlan.

Training hi Ministry of Environment, Forests and Climate Change bultumin Environment Education Programme (EEP) hnuaia buatsaih a ni a, district pasarih - Aizawl, Mamit, Kolasib, Serchhip, Saitual, Khawzawl leh Champhai aṭangin school eco-club-a mawhphurhtu (green teacher) 85 an tel. EEP hnuaiah hian Mizorama sikul leh college hrang hrangah eco club din a ni tawh.

Zirhonain a tum ber chu - leilung leh a chhunga awmte ṭha zawk siam turin nun dan phung ṭha lote thlak a, infuihna leh zirna pek a ni a; training chhungin hman khat daih sarâng (single use plastic) thlakna atan mau aṭanga hmanrua siam chhuah dan zir a ni ang. Green teacher-te hian a ṭul angin an district ṭheuha eco-club-ahte an zirtir chhawng leh dawn.