MLA-in JB College hun a hmanpui

J Buana College chuan nimin khan an college multipurpose hall-ah zirlai tharte lawmna, Freshers' Social an buatsaih a, bialtu MLA V Malsawmtluanga, Lunglei High Powered Committee vice chairman-in a hmanpui. J Buana College hi kum 1983-ah din a ni.

V Malsawmtluanga chuan, zirlaite chu theihtawp chhuah tur leh beiseina nei chunga hma lam thlir turin a chah a, "Sorkar tharah tihpuitu neih ṭhat (political fitness) vanga tlin a awm dawn lo a, a thiam thiam leh a thawk rim apiangte'n hna an hmuh dawn avangin in zir laiah theihtawp chhuah u la, tum fel tak neiin, a ṭul hunah dinhmun azirin in thil tum thlak ngam rawh u," a ti a; thuawihna nunpui turin a chah.

Sorkarin inrenchemna a kalpui thu sawiin V Malsawmtluanga chuan, "MLA-te puitu muster roll tihtlem te, MLA-te'n sorkar suma lirthei thar lei loh tihte kalpui a ni a, minister, MLA leh group-A officer-te'n sorkar aṭanga ration buhfai an lâk ve ṭhin titawp tura hmalak a ni. Inrenchem avang hian sorkarin tun hnaiah casual teacher a lak theih phah a, recruitment dan felfai tak hmanga lak an nih avangin sorkar sum dinhmun azira la dah ngheh theih tura ruahman a ni," a ti.

HPC Vice Chairman hian J Buana College ICT Committee buatsaih alumni portal leh college annual nagazine 2023-24 'Leitlang Dingdi' te a tlangzarh. J Buana College principal hlui Prof. J Zorema Proficiency Award chu Mizoram University under graduate exam-a ti ṭha zual mi pathum hnenah hlan a ni bawk.