Mizo ṭobul chungchang zirho a ni

ICFAI University, Mizoramah nimin khan 'International Seminar on Mizo Ṭobul Chhuina (Tracing the History and Origin of the Mizo People)' buatsaih a ni a; Art & Culture minister C Lalsawivunga'n a hmanpui. Seminar hi vawiinah chhunzawma zawh a ni ang.

Art & Culture Minister chuan, Mizoram ṭhenawmah Zo hnahthlak unaute'n harsatna namênlo an tâwk tih a sawi a, "Mizoramah Zo fate inpui tiin mi tam tak an rawn tlan khawm a, hetiang a nih avang hian mi tam tak thinlungah hnam chungchanga harh tharna, hnam movement a thleng mek," a ti.

Zo hnahthlakte history chu thua inhlan chhâwn a nih thu sawiin C Lalsawivunga chuan, "Kan ṭobul ziaka dahṭhat en lêt tur awm lo mah se, tih tak zeta rilru sêngin kan pipute sûlhnu leh ṭobul document-te awmna a hmun ngeiah kal chilha kan chhui chian a pawimawh. Rilru àwn bik leh herlam nei loa kan history-te hi kan historian-te'n chhui se ka duh," a ti a; zirhona chuan hnama harh tharna nasa zawk thlen se a duh thu a sawi.

Zirhona hi Art & Culture department hnuaia Tribal Research Institute leh ICFAI University-a Department of History leh Department of Mizo & Cultural Studies-te buatsaih a ni a; Mizoram University aṭangin Dr Lalrinnunga Hmar leh Nagaland University-a mi Prof. Jangkhomang Guite ten thupui an sawi a ni.