MLA-in Thingfal M/S jubilee a hmanpui

Thingfal Middle School chuan nimin khan an sikulah an kum 60 tlin, diamond jubilee an lawm a, bialtu MLA Lalramliana Papuia'n hmanpuiin, "Zirlaite ngaihsan hlawh pha lo zirtirtu chu a hnaah a hlawhchham sa a ni," a ti.

Lalramliana Papuia chuan, "Zirna siamṭhatna kawngah zirtirtute'n in pawimawhna in hriat thar leh a ngai. Zirtirtu hna hi hna zahawm tih ṭhin a nih laiin, a zahawmna chu mi hmuh danah a innghat lo a, zirtirtute chet zia leh nun danah a innghat," a ti a; ZPM sorkar chu zirna siamṭha turin fimkhur leh khauh takin a kal dawn tih a sawi.

Jubilee lawmnaah hian bialtu MLA hian diamond jubilee luungphun a hawng a; Thingfal M/S-a thawk tawh zinga thi tawh mi 10 sûnna hun hman a nih bakah, thawktu hluite hnenah chawimawina hlan a ni a, tlaiah ruai an ṭheh.

Thingfal M/S hi January 13, 1964-ah khawtlangin an din a, kum 1970-ah deficit-ah dah niin, kum 1972-ah sorkar sikulah hlan kai a ni. Headmaster pakhat, zirtirtu pasarih, fourth grade pakhat leh zirlai 76 an awm mek a ni.