LADC-ah BJP kaihhruai sorkar a piang

Lai Autonomous District Council (LADC)-a sorkarna chelh mektu Congress Legislature Party chuan nimin khan BJP Legislature Party an din thu, deputy chairman LR Dingliana Chinzah hnenah an thehlut a; LADC-ah BJP kaihhruai sorkar a piang.

BJP kaihhruai sorkar a pian thu hi nimin khan chief executive member T Zakunga chuan Lawngtlai Press Club-ah thuthar thehdarhtute hmaah a puang a, "State-a Congress sorkar a din laiin hnam hnufual zawkte'n ngaihsak leh duhsakna an dawng nasa a, Pu Lal Thanhawla leh a kaihhruai MPCC chungah lawmthu kan sawi a ni. State-ah party dang an sorkar hnuah district council sorkar chuan nasa takin an tuar a, hemi aṭanga chhan chhuaktu chu BJP sorkar an ni," a ti.

T Zakunga chuan, central lamah BJP chu thuneitu an nih bakah, district council-te'n hmasawnna an neih theih nan a ruahmanna awmte tihhlawhtlin tumin nasa takin hma an la tih sawiin, "Congress chhuahsana BJP-a kan lut ta hi ram leh hnamin hma a sawn zel theih nan leh hnam damna atana ti kan ni. Mimal hamṭhatna leh inthlanpui neih tur en zawn vanga lut kan ni lo," a ti a; Lai mipuite'n khaw êng an hmuh theih nan a dawhthleng an her rem niin a sawi.

Kum 2015-a LADC inthlanpuiah seat 25 awmnaah INC-in seat 16 an la a, MNF-in seat pariat leh independent-in seat pakhat an chang. Congress kaihhruai LADC sorkar kal meka Congress MDC palite chuan tun hnai khan MNF an lo zawm tawh bawk.