Thaidawr tlanga mandir sak tum vangin DC-in mi 5 aia tam awm khawm a khap

Songrongma, Tripura-te'n Thaidawr tlang, Mamit district-ah Shiv Mandir sak an tum avangin Mamit district magistrate Dr Lalrozama chuan nimin khan Thaidawr leh a chhehvelah mi panga aia tam awm khawm khap a nih thu a puang.

Mamit Bawrhsap tarlan danin, Songrongma hian Mizoram sorkar hnenah phalna la loin tun thla, October ni 19 leh ni 20 hian Thaidawr tlangah mandir sak an tum a ni. Mandir sak chu khawtlang duh loh zawng a nih bakah, remna leh muanna tichhe thei, a chhehvelah boruak ṭha lo zawk thlen theia ngaih a ni.

Mipui punkhawm vanga thil ṭha lo zawk a thlen lohna atan leh remna leh muanna tihchhiata a awm lohna turin Mamit DC chuan Phuldungsei Zampui leh Zomuantlang leh a chhehvelah mi panga aia tam awm khâwm khapna thupek a tichhuak a ni. Khapna thupek hi nimin aṭanga kalpui ṭan a ni a, thupek dang chhuah leh a nih hma chuan thla hnih chhung a huam ang.

Thupek hian dan leh thupek kengkawhtu hrang hrangte a huam lo a; thupek zâwm lote chu Indian Penal Code (IPC) Section 188 hmanga hrem tur an ni.

Songrongma-te'n Mizo­ramah mandir sak an tum tih hriat a nih avang hian Mizoram sorkar chuan October 9, 2020 khan Tripura sorkar hnenah khawilai hmunah nge mandir sak tum a nih hriattir tura tihna lehkha a lo thawn tawh a ni.