CBI hnena general consent pek mipui hmaa sawiho kan duh - MPCC

Mizoram Pradesh Congres Committee (MPCC) Vigilance Cell chuan, Central Bureau of Investigation (CBI) hnena general consent pek chungchangah chief minister Lalduhoma chu thu dik zîktluak lo sawiah an puh a, mipui hmaa sawiho an duh thu an puang.

MPCC Vigilance Cell hotute'n nimin khan Aizawl Press Club-ah thuthar thehdarhtute an kâwm a; MPCC senior vice president Lalnunmawia Chuaungo chuan, ZPM-in thu dik tawk loin mipui rilru hruai an tum nia sawiin, "Thu dik chu thu dik ni se tih hi kan duh dan a ni. Mipuite'n thu dik an hriat theih nan ZPM party-a he thila hriatna nei ṭha ber berte nen mipui hmaa sawiho ṭha kan ti a, chumi atan chuan ZPM kan ngenin kan sawm a, an pawm ngei kan beisei," a ti.

Chief Minister-in MPF-te bulah, 'Ram dan tharin a phût ang thlapin general consent kan pe,' tia a sawi thu media-ah an hmu tih sawiin Lalnunmawia chuan, "Mizoram mipui rilru hruai sual tumna a awm niin kan hria. CM leh ZPM sorkar sawisel ngawr ngawr kan tum a ni lo," a ti a; mipuiin thu dik an hriat theih nana ke pên chu an mawhphurhnaa an ngaih thu a sawi.

MPCC Senior Vice President chuan, Chief Minister-in 'Ram dan tharin a phût' a tih chu Indian Penal Code, 1860 thlaktu Bharatiya Nyaya Sanhita, 2023 nia a lan thu a sawi a, "CBI consent pek chungchangah he dan thar hian phût a nei lo. CBI Director-in state tinte hnena lehkha a thawn dungzuia ZPM sorkarin consent thar July 1, 2024-a an pekah pawh khan he dan thar hi sawi lan a ni miah lo," a ti.

Lalnunmawia Chuaungo chuan, Chief Minister-in inthlan campaign laia CBI hnena general consent pek a tiam ṭhin leh sorkar a pian hnua Assembly session hmasa bera a sawi chu July 1, 2024-a CBI hnena general consent an pek nen a inmil lo nia sawiin, "State sorkar phalna ziaka lak hmasak phawt tur a ni an ti leh si," a ti. ZPM-in CBI hnena general consent an pe anga an sawi chu MNF sorkar laia partial consent an pek nen danglamna a awm loh thu a sawi bawk.