Tennis court tihchhiat tumna kan nei lo - BVT

Bethlehem Vengthlang Local Council leh tlawmngai pawlte chuan thuchhuah inṭâwm siamin, an veng mipuite'n CP Road thenfai hnatlang an neih chungchangah Environment, Forest & Climate Change (EFCC) department-in thu dik zîktluak lo hmangin thuchhuah an siam niin an tarlang a, tennis court tihchhiat an tum loh thu an puang.

Bethlehem Vengthlang khawtlang hruaitute chuan, CP Road chu khawtlangin an mamawh avangin thenfai hnatlang neih an tum thu July 5, 2024-ah ngenna leh hriattirna Forest Training School (FTS) Principal hnenah an pe tih an tarlang a, "CP Road chungchanga ruahmanna awm tawh lehkha pawimawhte pek tel a ni. FTS Principal hian CP Road-a kan hmalak tum dan kan thlen hi July 11 & 22, 2024-a min chhannaah kawng tlang tura ruahmanna awm tawh sa document-te pe tura min ngenna chu July 5, 2024-a kan pek tel tawh avangin pek nawn ṭul tawh loah kan ngai a ni," an ti.

EFCC thuchhuahah, tennis court leh FTS gate tichhia anga tarlan chu thu dik tawk lo a nia sawiin, "Tennis court hi tihchhiat ni loin, a hungna bang ṭhenkhat erawh thenfai a ni a, tennis court tihchhiat tumna kan nei lo. A ṭul anga cheibâwl leh humhalh hi veng chhung ṭhalaite tana kan duh dan a ni," an ti a; gate pawh LC hriatpuinain temporary-a siamtir a nih thu an tarlang.

July 24, 2024 khan EFCC department chuan thuchhuah siamin, Bethlehem Vengthlang mite FTS complex chhungah dan loa an chêt thu leh sorkar thuneitute thu loa an che chu an dem thu an tarlang a ni.

BETHLEHEM VENGTHLANG TARLAN DANGTE

• EFCC department hian CP Road-ah hian mipui mamawh dante zir chianga kawngpui sial tum anga an tarlan hi BVT khawtlang hruaitute leh mipuite'n kan hriatpui lo.

• CP Road-a hnatlang neih kan tum thu an hriat hnuah pawh official emaw, verbal tal pawhin hriattirna an chhuah lo.

• Zoram mipui hmaa hmaiphih tumnaah kan ngai.