Lungleiah ui kawlh vulh khap dawn

Lunglei additional DC James Miahlung hoin nimin khan DC conference hall-ah sorkar hotute leh khawtlang hruaitute'n sorkar laipui Animal Husbandry & Dairying department hnuaia Expert Committee-in ui kawlh leh mihring nunna tiderthâwng theia an tarlante lak luh, inthlah puntir, vulh leh hralh khap an rêl.

Ṭhutkhawmah hian Lunglei khawpuia ran khuahkhirhna chungchang chu Lunglei Municipal Council-in inkaihhruaina fel tak a neih hunah an kenkawh tur a la ni dawn tih tarlan a ni a; chumi hmaa sorkar laipui Expert Committee-in a tarlan ui kawlhte khuahkhirh kawnga hma lo lak lailawk dan tur an ngaihtuah a ni.

Expert Committee tarlan ui kawlhte Lunglei district-ah lak luh, inthlah puntir, vulh leh hralh a nih loh nan district magistrate hminga khapna thupek chhuah an rêl a; magistrate, police leh local council-te nen a huhoin ui khuahkhirhna zawm a nih leh nih loh enfiah ni se, LMC pawhin ṭul leh ṭha an tih anga an lo bawhzui theih nan ngenna lehkha pek ni se, an ti.