HC-in Mizoram RRF notification a ṭhiahna Supreme Court-in a paih
Mizorama lui humhalhna dan, Riverine Reserved Forest (RRF) notification ṭhiahna thupek Gauhati High Court-in a lo chhuah tawh chu India rama court sang ber Supreme Court chuan July 24, 2024 khan a paih.
Gauhati High Court Aizawl Bench chuan January 27, 2021 khan order tichhuakin, kum 1965-a chhuah tawh RRF Notification chu a paih (set aside and quashed) a, Tuirial HEP chhunga zangnadawmna diltute hnenah zangnadawmna pek turin a ti nghal bawk.
Gauhati HC order kal zelah mi panga - Vanramchhuangi, Chaltlang, VL Hrima, Mission Veng, Romalsawma, Mission Vengthlang, Rongura Hrahsel, Mission Vengthlang leh Dr Lalbiakmawia Ngente te chuan Supreme Court-ah petition an thehlut a ni.
Thu dawn danin, mi pangate petition thehluh chu Supreme Court chuan April 24, 2024 khan pawmin a ngaihtuah a, July 24, 2024 khan order tichhuakin, Gauhati High Court-in RRF notification a paihna thupek (order) chu a paih ta a ni.
Mizo District Council chuan Mizo District (Forest) Act, 1955 Section 14 & 21 tlawhchhanin April 16, 1956 khan RRF chungchangah preliminary notification a tichhuak a, January 28, 1965-ah notification pangngai a tichhuak. RRF notification chu Mizoram union territory leh state a nih hnuah pawh chhawm zui zel a ni.
Thu dawn danin, Tuirial Hydro Electric Power Project tuikhuahin a chîm tura ram pass nei, zangnadawmna phûttute'n kum 2013 leh 2017-ah High Court-ah petition an thehlut a; chumi kal zelah chuan Gauhati High Court Aizawl Bench chuan January 27, 2021 khan order tichhuakin, RRF notification chu a paih (set aside and quashed) a, Tuirial HEP chhunga zangnadawmna diltute hnenah zangnadawmna pek turin a ti nghal bawk.
Gauhati HC-in RRF notification a paihna thupek chu Mizoram sorkarin writ petition thehluhin a khing lêt a, mahse, Mizoram sorkar chuan a khinletna chu a sût leh a, chuvang chuan High Court chuan November 9, 2022-ah thubuai a titawp a ni.
Hetih lai hian, Mizoram sorkara PHE department chuan The Mizoram (Protection of Rivers) Ordinance, 2023 a duan chu August 23, 2023 khan Mizoram Assembly-ah pawm a lo ni tawh bawk.