Hlawhtlinna phênah thawktu tumruh, taima, teirei peih an awm - LESDE Minister

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan Mizoram University Incu­ba­tion Centre hnuaia Entrepreneurship Deve­lop­ment Centre (EDC) a hawng a; thu sawiin, "Hlawhtlinna phenah hian thawktu tumruh, taima leh teirei peih an awm a ni," a ti.

Lalnghinglova Hmar chuan, ram hmasawnna tur leh ṭhan lenna tura suangtuahnate chu kutkawih eizawnna kaltlangin a tak ramah a chang dawn tih sawiin, "Building kan hawng a ni mai lo a, hmathlir kan tlangzarh tel. Entrepreneurship-a hlawhtling tur chuan idea neih ṭhat te, taimak te, market trend hriat chian te, networking thiamte a pawimawh," a ti a; tunlaiah degree hrawl tak tak aiin networking thiamnain kawngro a sut zawk thu a sawi.

Entrepreneurship programme kaltlangin Mizo ṭhalaite theihna peipun a, chhawr ṭangkai a nih dawn thu sawiin Minister chuan, "Kan ram economy a tiṭhang lian dawn. Entrepreneurship hian thil thar ngaihtuah chhuahna, chìn chhuahna kan ṭhalaiteah a chhém alh ang a, chu chuan eizawnna ngêlnghet leh khawtlang hmasawnna a hring chhuak dawn a ni," a ti.

Lalnghinglova Hmar chuan, kutkawih eizawnna chu Mizo ṭhalai tam takin an bawh mek zel karah 'risk' a tel avangin hlawhchham theih a nih thu a sawi a, "Kan ṭhalai entrepreneur-te'n tumruhna leh taimakna an neih a, an teirei peih a ngai a ni," a ti bawk.

EDC hi Indian Institute of Entrepreneurship (IIE) kaltlanga North Eastern Council bultum a ni a; hawnnaah hian MZU vice chancellor Prof. Dibakar Chandra Deka pawhin thu a sawi bakah, Incubation Centre siam Sentezel Apps leh Thlado Apps a tlangzarh.

MZU Incubation Centre director Prof. Laldinliana chuan MZU Incubation Centre hnuaiah company 38 an enkawl mek thu a sawi bawk.