Minister-in NE Water Conclave hmanpui

Public Health Engineering minister Prof. Lalnilawma chu July 25, Ningani khan Hotel Vivanta, Guwahati-a Indian Chamber of Commerce (ICC) buatsaih North-East Water Conclave-ah khualzahawm a ni a; tuihna leh ramngaw humhalh turin ṭanrual a pawimawh thu a sawi.

Prof. Lalnilawma chuan, Mizoramah ṭhál laiin tuihna kang chat a tam ṭhin thu leh mipuiin harsatna an tawh phah ṭhin thu a sawi a, "Tui vanga harsatna leh kan boruak, sik leh sa inthlak danglam nasa lutuk tihziaawm nan tuihna leh ram ngaw humhalh kawngah ṭanrual a pawimawh. Ramriin a ṭhen ve loh leilung hausakna inṭâwm pawimawh tak boruak thianghlim leh lui luangte ṭha taka enkawl chu mi tin mawhphurhna a ni," a ti.

Conclave-ah hian hmarchhak state-a PHE minister-te leh department hotute an tel a; thupui chu 'Creating an efficient and sustainable water future for North-East India' tih a ni.

NE Water Conclave-ah hian PHE secretary F Liantluanga leh engineer-in-chief Rothanga te pawh an tel a; Rothanga'n Mizoram tui dinhmun leh harsatnate a tarlang.