Medica-ah Mizo 2,000 vel enkawl tawh
Mizoram sorkarin a pawm damdawi-in (empanelled hospital) zinga mi Medica Superspeciality Hospital, Kolkata hotute chuan nimin khan Aizawl Press Club-ah thuthar thehdarhtute an kâwm a; khawl, hmanrua leh bungraw ṭha ber ber an kawl thu leh an damdawi-inah Mizo 2,000 vel an enkawl tawh thu an sawi.
Medica Superspeciality Hospital hotute chuan an damdawi-inah Mizo damlo 2,000 vel an enkawl tawh thu leh Mizo nurse 15 an thawh mek thu an sawi a; Mizo nurse-te chu an ṭangkaipui thu leh Mizo damlote tan an ṭangkai hle thu an sawi a ni.
Dr Hash Jain, senior consultant, Neurosurgery chuan, lu leh thluak lam natna chi hrang hrang enkawl tur leh zai turin tunlaia hmanrua leh bungraw ṭha ber ber an neih thu a sawi a, "Medica Hospital-ah hian Mizo damlo 700 chuang kan enkawl tawh," a ti.
Dr Niket Arora, senior consultant, Cardiac Surgery chuan, open heart surgery tia sawi ṭhinah lung la chhuak kher loa an zai theih thu leh Mizo eng emaw zat zaia a enkawl tawh thu a sawi a, "Lung lam ṭha lo nia inringhlelte chu inentir vat tur a ni... Heart attack pumpelh turin meizuk loh a ṭha," tiin, lung ṭha lo neite chu hriat chhuah hma leh enkawl hma a pawimawh thu a sawi.
Medica Superspeciality Hospital hotute dawi danin, an damdawi-in hi kum 2010-ah din niin, a din tirh aṭangin Mizorama damlote an enkawl ṭhin a, tun thlengin Mizoram sorkarin a pawm damdawi-in a ni.
Neurology, Cardiac Science, Orthopedics, Gastroenterology & GI Surgery, Kidney, Oncology leh natna khirh bik enkawlnaahte Centre of Excellence an nei a; natna dang chi hrang hrang an enkawl ṭhin bawk.