Hlawhtlinna a thlawna neih chi a ni lo, sual chhuah ngai a ni - HTE Minister

Zirtiri Residential Science College (ZRSC) chuan nimin khan Vanapa Hall-ah zirlai tharte lawmna Freshers' Social leh zirlai ti ṭhate chawimawina an buatsaih a, Higher & Technical Education minister Dr Vanlalthlana'n a hmanpui. Minister chuan, hlawhtlinna chu a thlawna neih chi ni loin, sual chhuah ngai a nih thu a sawi.

Dr Vanlalthlana chuan, zirlaite chu taima tak leh tih tak zeta lehkha zir turin a fuih a, "Mi taima leh ti tak zette chauh an ding chhuak tawh a, hlawhchham rap rap pawh hlau loin theihtawp chhuah ang che u. Hlawhtlinna hi a thlawna neih chi a ni lo a, sual chhuah ngai a ni," a ti.

HTE Minister chuan, Aizawl Venglaia ZRSC campus-ah skill development programme chak taka kalpui tum a nih thu a sawi a, a bial chhung mite leh ZRSC zirlaite tan hmasawnna pawimawh a thlen a beisei thu a sawi bawk.

ZRSC hian kum 2022 khan NAAC grade A a hmu a; Mizoram University under graduate final semester exam 2024-ah subject hrang hranga top 10-ah ZRSC zirlai 38 an tling a, chu'ng zinga pali chu university subject topper an ni.