KHAWTHLIR

KṬP-in thisen pe

KṬP, Pangbalkawn Pastor Bial chuan nimin khan Meidum Kohhran sunday school hall-ah thisen pek an huaihawt a, Kolasib District Hospital tan thisen unit 36 an pe a, petute mipa 31 leh hmeichhia panga an ni.

MSCPCR hotu mi 4 ruat thar

Mizoram State Commission for Protection of Child Rights (MSCPCR) chairman atan Jimmy Laltlanmawia ruat a ni a, member atan R Lalṭanpuia, Darṭhakunga leh Vanhmingliani te ruat an ni bawk. MSCPCR hotu tharte hian nimin khan an hna an zawm nia thu dawn a ni.

MLA-in model school a puang

Aizawl East-II bialtu MLA B Lalchhanzova chuan a bial chhunga MLA model school atan L Buana Model Primary School, Chhinga Veng a thlang. July 25, Ningani khan model school puanna hun hman a ni a; B Lalchhanzova chuan, zirlaite'n sikulah hlim taka hun an hman theih nan an mawhphurhna pawimawh tak hlen chhuak tura theihtawp chhuah zel turin zirtirtute leh nu leh pate a chah.

Khawl chhia siamna tlawh

Cyclone Remal vanga tuilianin Tlawng lui Reiek kaia PHE tui pump khâwl a tihchhiatte PHE department-in Guwahati-a an siamṭhattirna hmun chu July 25, 2024 khan PHE minister Prof. Lalnilawma'n a tlawh. Khawl chhe siamnaa hotute chuan khawl chu siamṭhat thuai an inbeisei thu an lo hrilh niin sorkar thuchhuahin a tarlang.

Freshers' social

Mizoram Polytechnic, Lunglei chuan nimin khan an multipurpose hall-ah Freshers' Social an hmang a, Lunglei South bialtu MLA Lalramliana Papuia'n a hmanpui. MLA chuan, "Vanneih vanga mi ropui leh langsarte khawvelah ngaihsan an ni ngai lo a, thawhrimna leh tumruhna vanga dingchhuakte khawvelin a ngai ropui zawk ṭhin," a ti.