Congress-in political session hmang

Congress party chuan nimin khan Congress Bhavan-ah political session an hmang a, thusawitu John Siamkunga, MPCC adviser chuan, Mizoramin a mamawh ber chu sum enkawl thiam niin a sawi.

John Siamkunga chuan, kum 2008-ah Congress party a sorkar ṭan aṭangin rethei takin bul an ṭan nia sawiin, "Kum 2018 kan thlen meuh chuan Mizoram hian sum lama harsatna kan tawh ṭhin chu kan sukiang thei. Kan sorkar chu a tla ve leh a, party dang an rawn sorkar a, Mizoramin sum lamah harsatna nasa tak kan tâwk chho leh ta a ni. Kan ramin a mamawh ber chu sum enkawl thiam a ni," a ti.

ZPM-in kum khat pawh sorkarna an chelh hmain sum tam tak an pûk tawh nia sawiin, "Mizorama la thleng ngai lo, kan budget vbc. 14,412 a nih laiin vbc. 14034.76 bá kan nei thei hi a mak hle a ni," a ti a; ZPM-in year of consolidation an tih chu an hriatthiam loh thu a sawi.