YMA Inkhawmpui Lian thlir lâwk

Sakawrdai khuaa kumina YMA Inkhawmpui Lian neih tur thlir lâwkin nimin khan bialtu MLA Lalchhandama Ralte hoin Sakawrdai community hall-ah Sakawrdaia pawl hrang hrang hruaitute an ṭhukhawm a, YMA Inkhawmpui Lian thlen dan tur leh inbuatsaih dan tur an sawiho.

Ṭhutkhawmah hian Sakawrdaia kohhran, political party leh tlawmngai pawl hrang hrang aiawhte an tel a; khaw ṭhenawm Thingsât leh Vaitin aṭangin khawtlang hruaitute an tel bawk.

Lalchhandama Ralte chuan, a bial chhunga Sakawrdai khuain YMA Inkhawmpui Lian a thleng tur chu lawmawm a tih thu sawiin, "Chhungkaw tinin palai a tam thei ang ber kan thlen theih nan tun aṭangin inbuatsaihna kan kalpui a ngai a, YMA inkhawmpui neih tawh zawng zawnga palaite hriat reng tlak Sakawrdai khawpuiin kan siam theih nan khawtlang mipui kan ṭan rual a ngai a ni," a ti a; bialtu MLA a nih angin theihtawp a chhuah dawn thu a sawi.

October 2025-a YMA Inkhawmpui Lian thleng turin Organising Committee din tawh a ni a, sub-committee pasarih din a ni tawh bawk.