VDA-in General Conference an hmang

Veterinary Diploma Holder Association (VDA) chuan nimin khan Vety Polyclinic Hospital conference hall-ah General Conference vawi 26-na an hmang a, Animal Husbandry & Veterinary (AH&Vety) minister C Lalsawivunga'n hmanpui.

C Lalsawivunga chuan, AH&Vety department-in hmasawn turin hma lam a pan mek tih sawiin, "State puitling kan nih aṭanga kum 38 liam hnuah pawh sa, artui leh bawnghnutea intodelh tura hmalak a ni chunga kan la intodelh lo hi ngaihtuah chian a ṭul," a ti a; VFA-te chu ngaihtuahna thar púa saa Mizoram a intodelh theih nan ṭan la turin a chah.

African Swine Fever leng vangin Mizoramah vawk vulhtute'n harsatnate nasa tak an tawh tih sawiin Minister chuan, "Vety department thawktute lakah mipuite'n beiseina sang tak an nei a, ran damlo enkawl kawngah theihtawp kan chhuah zel a ngai. Min mamawhtute tana biak nuam leh dàwr nuam, mamawh huna che chhuak thei tura kan inpeih reng a ngai," a ti.