Chhiatna avangin hmasawnna tihṭhuanawp kan tum lo - Minister

Minister Lalthansanga chuan July 25, Ningani khan a bial Aizawl East-I chhunga Zemabawk North-a chhiatna thlengte a tlawh a; chhiatna thleng avangin hmasawnna tihṭhuanawp an tum loh thu a sawi.

Lalthansanga chuan, tun hnaia chhiatna thlengte chu a namailo hle tih a sawi a, "Hmun hrang hranga chhiattawhna avangin hmasawnna hnathawh lo chawlh ringawt a rem lo a, department-te'n mahni chanpual ṭheuhah ram tan theihtawp an chhuah reng. Ram tan theihtawp kan chhuah zel dawn a, mipui pawhin sorkar thâ kan tih chak a ngai. Ram inrêlbàwlna hi sorkar kuta dah mai loin, kan zavaia ṭanruala thawhho a ngai a ni," a ti.

Department a enkawlte an awm mai mai lo nia sawiin Lalthansanga chuan, sangha thianghlim ei tur hnianghnâr a awm theih nan Fisheries department-in hma an lak thu te, Sericulture chu ram sum leh pai dinhmun chawi kâng thei tur leh eizawnna ngêlnghet din theihna a nih thu te, department dangte pawhin ṭhahnemngai taka an thawh mek thute a sawi bawk.