India independence hnuah NE hmasawn chak lo: Hawla

Confederetion of Indian Industry (CII) chuan Inrinni khan ITC Sonar Bangla, Kolkata-ah INFRA EAST 2015 an buatsaih a; an hun hmanpuitu chief minister Lal Thanhawla chuan, India independence hnu lamah hmarchhak bialin hma a sawn chak loh thu a sawi.

Lal Thanhawla chuan, India hmarchhak bial chu hmasawnna hnain a mamawh infrastructutre hrang hrang a tlâkchham avang­in India hmun dangte aiin a hnufual tih a sawi a, "Independence hma lam hunahte chuan Asia chhim chhak ramte nena insumdawnna bulpui ber chu Kolkata a ni ṭhin a, chung lai hunah chuan kan ziaawm ve hle. Independence hnu lamah ngaihthah kan ni ta a, hma kan sawn chak lo hle a ni," a ti.
Hmasawnna ruhrel hrang hrang - kawngpui siamah te, rel leh thlawhna lamah te, telecommunication-ahte leh thil siam chhuahna tura industry din lamahte hmarchhaka hma la turin CM Lal Thanhawla chuan CII-te a sawm a ni.
CII hi sorkar nghenchhana ding a ni lo a, boruak tichhe lo zawnga India hmasawnna kalpuitu pawl, a bikin industry dinna lama ke pêntu an ni.