100% pass percentage nei Sikulte lawmpuina hlan a ni

Kum 2020-a HSLC leh HSSLC result-a zirlai pass vekna sorkar sikul 21-te lawmpuina hun nimin khan School Education directorate conference hall-ah buatsaih a ni a, School Education minister Lalchhandama Ralte-in a hmanpui.

Education Minister chuan, HSLC leh HSSLC result-a zirlai pass tir vek thei sikulte chu an hlawhtlinna chhawm nung zel tur leh engtin nge hma an sawn zel ang tih ngaihtuah turin a chah a, "Zirtirtu indaih lohna nasa tak karah hripui léng vangin post ruak eng emaw zat hnawhkhah tura hmalak mek a sukuk rih a, chuvangin, thawktu awm ang angte theihtawp chhuaha ṭan lak leh zual a ṭul," a ti.

Lalchhandama Ralte chuan, thawktute hamṭhatna ngaihtuahin hmasawn zel dan tur kawng sorkarin a dap mek tih sawiin, "Mizoram sorkarah Education hi department lian ber an nih angin inrêlbàwlna ṭha zawk nei turin hmalak mek a ni," a ti a; sikul, hmanrua leh bungrua nei ṭha zawk, zirtirtu thiam leh ṭha rualin an enkawl sikulte'n private school an tluk lo fo chu pawi a tih thu a sawi.

School Education secretary Esther Lalruatkimi chuan, zirlai pass tir vek thei sikul ṭha Mizoram hmun hrang hrangah a awm chu lawmawm a tih thu a sawi a, "Sikul ṭha tehfung hrang hrang awm mah se, tun dinhmunah sikul ṭha tehfung kan neih ṭhat ber chu result ṭha hi a ni," a ti.