Khawthlir

Thisen pe
Bethlehem Branch KṬP chuan an branch Golden Jubilee lawm nan Inrinni khan an Kohhran hall-ah blood donation camp leh free clinic an buatsaih a, Aizawl Civil Hospital tan thisen unit 45 an pe a, a petute mipa 39 leh hmeichhia paruk an ni. Lungleia AYF-te pawhin Inrinni khan Lunglei Civil Hospital-ah thisen unit 38 an pe a, a petute mipa 24 leh hmeichhia 14 an ni.

Hmeichhe inkhawmpui
Presbyterian Kohhran hmeichhiate'n pastor bial hrang hranga bial inkhawmpui an neih chu nizan khan a ṭiak. Kohhran Hmeichhe bial inkhawmpui hi Mizoram chhung leh pawna bial hrang hrangah neih a ni a, Inrinni khan rorel inkhawm neih a ni.

In sak thatsak
Lawngtlai district-a Lungzarhṭum khuaa February 4-a in kang ral neitu Lalfakzuala chu February 5-7 khan khawtlangin an in tur an saksak a; in sak hnatlangah hian Lungzarh-
ṭum khaw mite bakah, Bualpui NG aṭangin mi ṭhahnem tak an thawk chhuak a ni.

KTP khawmpui
Evangelical Church of Maraland (ECM) ṭhalai pawl, KTP inkhawmpui, Zawngling khuaa neih chu nizan khan a ṭiak. Inkhawmpui hi February 6, 2015 khan ṭan a ni a, palai 3,000 chuang an kal a; inkhawmpui thupui chu 'Krista aia palai' tih a ni.

Satel pe
Parliamentary secretary Joseph Lalhimpuia chuan Inrinni khan Aizawl Zoological Park-a dah atan satel kg. 10-a rit a pe. Satel hi Joseph Lalhimpuia fate'n Aizawl Zoological Park curator Lalrinliana hnenah an hlan a ni.

Chinai-a sangha hrai man
Sailulak branch YMA chuan an humhalh lai Zuvalui chinai-a vawtu mi 11 chu Inrinni khan an man. Sailulak YMA hian an khaw ram zawna Zuvalui leh Tuipui luia nungchate chu tura hrai, chinai, bomb leh generator hmanga man an khap a ni.