Biak-in, sikul, hnuchham-inte'n Dân tharah chhiah an chawi dawn

Mizoram sorkarin tun hnaia chhiah lakna dan thar a siamah a hma lam zawnga chhiah chawi awltir ṭhin, mipui vangtlang tana hmun pawimawh - biak-in, sikul leh hnuchham enkawlnaahte pawh chhiah lak a ni tawh dawn.

RTI Act hmanga zawhna Land Revenue & Settlement depart­ment SPIO-in a chhan danin, LRS department-in chhiah chi hrang hrang an lakna dân thar an hman mek hi, 'The Mizoram Land Revenue Laws' tih a ni a, January 6, 2013-a hman ṭan a ni.

Dân tharah hian biak-in, zirna-in hnuchham in (orphanage home), thlanmual, community hall, khelmualte chhiah awltirna tur a awm tawh lo a; chuvang chuan hengahte hian chhiah lak ve tho tur a ni tawh dawn a, hemi chungchang hi The Mizoram Land Revenue Laws-a Rule 30 (i)-ah a inziak a ni.

Revenue department dan hlui, kum 2005-a siamah chuan biak-in, zirna in (school), hnuchham in (orphanage home), thlanmual, community hall leh khelmualte chu chhiah âwltirna tur a awm a, chuvang chuan hengahte hian chhiah lak a ni ngai lo (Order No S.11028/1/105-LSC/DTE (REV)/12 dt 19.10.05).

Vantlang hmunte chhiah awl­tirna tur thupek (order) hi October 19, 2005-ah Land Re­ve­nue & Settlement director, Za­dingliana hun laia chhuah a ni a; thupekah hian chhiah awlna tur dân ṭhenkhat a chuang a ni.