AMC Chairman Zarzoliana'n mi vertherte thil tihah a puh
AMC chairman, Zarzoliana chuan, Aizawl Municipal Council sorkara thil thleng mek chu zahthlak a tih thu leh ram hmangaihtute chêt dan ni loin, mi vertherte thil tih a nih thu a sawi.
AMC councillor pasarihte'n February 6, 2015-a Aizawl DC hnena AMC sorkar ṭhiat tura ngenna lehkha an thehluh chungchanga zawhna chhangin Zarzoliana chuan, Aizawl khawpui hmasawnna atana thawk tura din AMC hmasa ber mipuiin an hriat reng dan tur chu zahthlak a tih thu leh ṭha lo a tih thu a sawi a; lalna leh thuneihna duh vanga khawpui hmasawnna tur pawh ngaihtuah loin thil a kal ṭhin nia sawiin, pawi a tih thu a sawi a ni.
Zarzoliana chuan, Congress party leh ZNP-te'n AMC inthlanah hnehna changa sorkar an siam chu tluang taka a kal laiin Congress party-in anmahni chauha sorkar siam an tum avangin thil a kal fuh lo a, councillor ṭhenkhatte'n an awmna party an chhuahsan phah niin a sawi a; mahse Congress party thil tum a kal fuh lo a, ZNP, MNF leh MPC party councillor-te'n sorkarna an siam ta zawk niin a sawi bawk.
AMC sorkar tluang taka a kal laia tute emaw lalna leh thuneihna duh luat vanga thil dang buaipui a ngai leh ta chu pawi a tih thu sawiin, AMC chairman chuan, MNF, ZNP leh MPC-in sorkar inṭâwm an siamah MPC thlauhthlak tumna a awm lo niin a sawi.
ZNP aṭanga councillor pahnih chhuak tate leh MPC aṭanga councillor pakhat chhuak tate chu awmna mumal an neih loh avangin AMC sorkara tel ve tura sawm an nih thu sawiin, Zarzoliana chuan, "Tute emawin a dik lo zawnga thil kalpuiin, thil dang daih a inher chhuak dawn ta niin a lang. MPC thlauhthlak tumna a awm nia puhna hi an chhuanlam mai mai a ni," a ti.
Zarzoliana chuan, AMC chairman turin amah chu mi ṭha berah a inngai lo tih sawiin, fiahna a paltlang zo lo a nih pawhin councillor a ni leh mai dawn tih a sawi a; amah bûk a nih hunah a sawi duhte chiang zawka a la sawi tur thu a sawi bawk.